ଜ୍ଞାନର ମଧୁ - ଶ୍ରୀ ଅଶୋକ କୁମାର ନାୟକ

 ଥିଲେ ନିଷ୍ଠା ହୃଦେ ପଞ୍ଚ ଲକ୍ଷଣର

ଉତ୍ତମ ବିଦ୍ୟାର୍ଥୀ ହୁଏ,

ଉପେସିତ ହୋଇ ଜ୍ଞାନର ଆଲୋକେ

ସମାଜରେ ପୂଜା ପାଏ  l

ନିର୍ବାଣ ନିମନ୍ତେ ଯୋଗ ଆରାଧନା

ମୁନି ଯୋଗୀ ସନ୍ଥ ସାଧୁ,

ଜାରି ରଖିବାରୁ ନିଷ୍ଠାରେ ସାଧନା

ପାଇଥାନ୍ତି ବିଭୁ ମଧୁ   l

ସ୍ବଧର୍ମ ନିଷ୍ଠାରେ ଗୃହସ୍ଥ ପାଳିଲେ

ସୁଖ ଶାନ୍ତି ପ୍ରାପ୍ତ ହୁଏ,

ଅଗ୍ନିର ଜ୍ୱଳନେ ନୋହିଲେ ଅଶାନ୍ତି

ଲକ୍ଷ୍ୟଚ୍ୟୁତ ହୋଇଥାଏ   l

ନିଷ୍ଠାର ସହିତ ବାୟା ଚଢ଼େଇଟି

ବସା ତାର ଗଢ଼ିଥାଏ,

ଆସିଲେ ତା'ସାଥେ ଯେତେ ଝଡ଼ଝଞ୍ଜା

ଲକ୍ଷ୍ୟ ବିଚ୍ୟୁତ ନ ହୁଏ  l

ସାଗର ସଙ୍ଗମ ତଟିନୀର ଧର୍ମ

ଏକ ଲକ୍ଷ୍ୟ ନେଇ ବହେ,

ଅତିକ୍ରମି ପଥ ଘାତ ପ୍ରତିଘାତେ

ଅନେକ କଷଣ ସହେ   l

ଅନୁଗତ୍ୟ ସେବା ନିଷ୍ଠା ସହଚର

ପ୍ରେମ ତପ ଆଚରଣ,

ଲକ୍ଷ୍ୟ ପ୍ରାପ୍ତି ହେଲେ ସେ ପାଇଁ ସାବିତ୍ରୀ

ପାଇଲେ ସ୍ୱାମୀଙ୍କ ପ୍ରାଣ  l

ଜାରି ରଖେ ଜ୍ଞାନ ନିଷ୍ଠା ସହକାରେ

ପ୍ରତିଟି କରମ ପାଇଁ,

ପ୍ରାପତ ହୋଇବ ତେବେ ଯାଇ ଲକ୍ଷ୍ୟ

ଜଗତେ ଜିତିବ ଯାଇ  l

ଏକଲବ୍ୟ ପାର୍ଥ ଆରୁଣି ନଚିଙ୍କ

ଲକ୍ଷ୍ୟ ପ୍ରାପ୍ତି ନିଷ୍ଠା ପାଇଁ,

ଅନେକ ବାରତା ପୁରାଣେ ରହିଛି

ଜ୍ଞାନର ମଧୁ ଶୋଭଇ   l

  - ଶ୍ରୀ ଅଶୋକ କୁମାର ନାୟକ

          କେନ୍ଦୁଢ଼ିପି, ନୟାଗଡ଼